| Fotografias dal teater da finischun da l’on scolastic 2007/2008
La scoula primara da Ftan e la scoula da Rudolf Steiner Scuol (Scoula
libra) han preschantà insembel ün teater per la fin da l’on da scoula - ün gö da stà. Ün gö da stà
tenor Margrit Lobeck, traducziun libra in rumantsch Mario Pult
La scoula primara da Ftan e la scoula da Rudolf Steiner Scuol (Scoula libra) han preparà insembel ün teater per la fin da l’on da scoula.
Nus magistras e magisters da tuottas duos scoulas lain promover la sensibilità e l’incletta dals uffants pels müdamaints cha la natüra fa dürant l’on. La natüra cumainza a crescher our dal temp da pos, our dal stret e s-chür da l’inviern vers la vasta flurischun e richezza da culuors da la stà, ragiundscha la combla madüranza dals früts d’utuon e fuorma in möd misterius ils semins. Excursiuns our il liber ans pussibilteschan d’observar il muond da plantas e bes-chas, ma eir musicists, poets e pitturs ans sun ün grond agüd. Els inclegian intuitivmaing ils process da la natüra, sun averts per chosas zoppadas e profuondas chi nu’s vezza, ma chi’s sainta.
Chanzuns, sots in rudè, poesias e pittura approfundischan noss sentimaints e noss’incletta pella terra chi’s müda adüna darcheu.
In quist sen han giovà ils scolars e las scolaras da nossas duos scoulas ün teater a la fin da l’on da scoula 2007/2008. I’s tratta d’ün gö da stà, d’ün sömmi da stà, cun dialas chi ballan, nanins chi chavan cristals, cun fauns chi fan lur stincals e cul Pan, il vegl Dieu da la natüra, chi tegna uorden cun tuot.
Nus vain tschernü consciaintamaing la quietezza d’ün clerai i’ls contuorns da Ftan per far las prouvas e las rapreschantaziuns. Actuors ed aspectatuors vaivan da chaminar bundant üna mezz’ura per rivar al lö e pudaivan uschè as distanzchar plan a plan dal travasch dal minchadi ed esser averts pella bellezza e vivacità artistica immez la natüra.
Las rapreschantaziuns sun stattas ils 23, 24 e 26 da gün.
Nus savain grà a tuot las persunas, instituziuns, fundaziuns ed al Cumün da Ftan pel sustegn finanzial. Als genituors da tuottas duos scoulas chi han güdà a cusir ils costüms ingrazchaina cordialmaing.
Per realisar quist proget d'eiran dependents dad agüd finanzial implü.
Grazcha fich a tuots chi ha dat alch vi da la collecta davo nos gö.
Vair fotografias quia
|
|
|
26.06.2008 :: 2926 Views :: Scoula
|
 |
|