| Teater a Ftan
La società da teater da Ftan preschainta ingon la cumedgia „Ün quader chi nu quadra“, 29 e 30 mai, 4 gün. La società da teater da Ftan preschainta ingon la cumedgia da Jon Semadeni „Ün quader chi nu quadra“, redschia fa Mario Pult.
Als 29 da mai ha lö a Lavin üna dieta da commemoraziun pel scriptur, redschissur, teatrist e cabarettist Jon Semadeni, oriund da Vnà, chi cumpliss als 30 da mai 100 ons. Quista vain organisada cumünaivelmaing da l’Archiv svizzer da litteratura, la Lia Rumantscha e’l romanist Rico Valär. La società da teater da Ftan as partecipescha a quist evenimaint cultural cun dar il toc surmanzunà. Duos ulteriuras rapreschantaziuns han lö a Ftan.
Cun la cumedgia „Ün quader chi nu quadra“ ha vuglü Jon Semadeni dar nouv schlantsch al teater rumantsch e far frunt a la tendenza da giovar cumedgias tudais-chas cun cuntgnü majer. Quista cumedgia in trais acts ha sco tematica la nardà dal muond e piglia suot la marella il möd superficial da la cumünanza da trattar dumondas d’art. La premiera da „Ün quader chi nu quadra“ ha gnü lö als 13 favrer dal 1960 a Scuol. Uossa, 50 ons plü tard, giova la società da teater da Ftan quist toc da maniera autentica. Quai voul dir cha’l temp es fixà süls ons 1960 (culissa, büschmainta ed utensils) e cha la lingua es eir quella oriunda da quel temp.
La società da teater da Ftan invida cordialmaing a tuot la populaziun da gnir a verer il toc pretensius. Reservaziuns pon gnir fattas pro Lucia à Porta (telefon 081 864 98 77) e quai a partir dals 25 mai 2010 tanter las 16.00 e las 18.00.
Datas da rapreschantaziun:
Sonda, 29 mai, 20.00, sala polivalenta a Lavin
Dumengia, 30 mai, 20.15, sala polivalenta a Ftan
Venderdi, 4 gün, 20.15, sala polivalenta a Ftan
Dal rest: reservaziuns per la dieta a Lavin dals 29 mai chi cumainza a las 10.00 piglia incunter Mario Pult, telefon 081 860 07 61, o e-mail mario.pult@rumantsch.ch.
|
